Հավելյալ տեղեկություններ

Նյարդավիրաբույժ

Նյարդավիրաբուժական բաժնի վարիչ <<Էրեբունի>> Բժշկական կենտրոնում

Երևանի Մ. Հերացու անվան պետական բժշկական համալսարանն ավարտելուց հետո Սարգիս Եղունյանը կրթությունը շարունակել է Ուկրաինայի Ուժգորոդ քաղաքի ազգային համալսարանի հետդիպլոմային կրթության ֆակուլտետի՝ նյարդաբանության, նեյրովիրաբուժության և հոգեբուժության ամբիոնի հենքի վրա գործող կլինիկական օրդինատուրայում, որը հաջողությամբ ավարտել է 2018 թվականին:

Նույն թվականին էլ ընդունվել է վերոնշյալ համալսարանի ասպիրանտուրա՝ «նեյրովիրաբուժություն» մասնագիտությամբ:

2019 թվականին հաջողությամբ հանձնել է թեկնածուական քննությունները փիլիսոփայությունից, անգլերենից և մասնագիտական այլ առարկաներից:

Ասպիրանտուրայում սովորելու տարիներին հետևողականորեն և մեթոդաբար կատարել է ատենախոսության թեմային առնչվող հետազոտություններ, ակտիվ մասնակցություն ունեցել հայրենական և միջազգային գիտաժողովներին:

Երիտասարդ մասնագետի ատենախոսության թեման է «Դիմային նյարդի պրոֆիլակտիկան և բուժումը կամրջաուղեղիկային անկյան (ԿՈՒԱ) մեծ գոյացությունների հեռացման դեպքում»:

Սարգիս Եղունյանն այս թեմայով հրատարակել է գիտական հոդվածներ և ուսումնասիրություններ:

Թեև երիտասարդ տարիքին, մասնագետը կարողացել է բավականաչափ փորձ ձեռք բերել՝ ուսանելով Եվրոպայում, ԱՄՆ-ում և ծանոթանալով այստեղ կիրառվող բուժման մեթոդներին ու եղանակներին:

Այսօր Սարգիս Եղունյանը վերադարձել է հայրենիք, աշխատում է «Էրեբունի» բկ-ի նյարդավիրաբույժների փորձառու թիմի հետ՝ մեծ նվիրումով ու պատասխանատվությամբ իր գիտելիքները ներդնում մարդկանց բուժելու և առողջացնելու գործում:

Կատեգորիա - ԲԺԻՇԿՆԵՐ
Էջը դիտումների քանակը՝ 6159